Kijan Evalyasyon "Prop Firm" Mache? (Tès Rezistans Pou Pwouve Sistèm Ou An)
Zanmi m yo, nan 5 an eksperyans mwen genyen ap viv nan mache finansye a chak jou, mwen aprann yon gwo leson: pa gen okenn gwo enstitisyon k ap ba w jere milyon dola sou baz senp konfyans. Lè n ap gade sa nan nivo "Premye Prensip" (First Principles), nou wè mond lajan an baze sou jesyon risk.
Menm jan ou pa t ap janm mete kòb ou nan yon gwo pwojè imobilye oswa yon konpayi asirans si w pa sèten moun k ap jere l yo konn sa y ap fè, se menm jan an yon "Prop Firm" fonksyone. Anvan yo ba w kle kòfrefò a, yo dwe fè sa nou rele nan syans yon "tès rezistans" (stress test). Yo dwe asire yo materyo sèvo w solid ase pou l pa kraze anba presyon mache a.
Men kijan pwosesis evalyasyon sa a fonksyone etap pa etap, san okenn mistè.
Lojik Dèyè Tès La: Filtre Chans Kont Konpetans
Lè w ap achte yon evalyasyon (challenge), konpayi an ap ba w yon kont "Demo" ki gen lajan vityèl sou li (pa egzanp $25,000 oswa $100,000). Objektif yo se wè si w ka pwodui pwofi san w pa depase yon limit pèt yo ba ou. Yo vle wè si reyisit ou a se rezilta yon sistèm matematik ki byen kalkile, oswa si se senp chans (tankou yon moun k ap parye nan aza san l pa konprann jwèt la).
Pwosesis sa a jeneralman divize an de (2) gwo faz:
Faz 1: "Challenge" Lan (Pwototip La)
Se premye gwo tès la. Nan faz sa a, konpayi a ba w de (2) gwo paramèt ou dwe respekte. Se kòmsi yo ba w yon machin epi yo di w: "Fè yon vwayaj soti Pòtoprens rive yon kote byen lwen nan yon tan fiks, men ou pa gendwa fè okenn aksidan."
Objektif Pwofi (Target): Yo mande w pou fè yon pousantaj pwofi byen presi, an jeneral anviwon 8% nan kapital la. Sou yon kont $100,000, sa vle di ou dwe fè $8,000 pwofi.
Limit Pèt (Drawdown): Se isit la pifò moun echwe. Ou pa ka pèdi kòb jan w vle. Yo mete yon limit pèt chak jou (souvan 5%) ak yon limit pèt total (souvan 10%). Si w touche youn nan limit sa yo, kous sikwi a fèt, tès la kanpe, epi ou echwe.
Faz 2: Konfimasyon An (Verifikasyon)
Anpil moun ka gen chans yon fwa. Yo ka riske tout kont lan sou yon sèl gwo tranzaksyon epi yo pase Faz 1 an. Men, lasyans di nou chans pa dirab. Pou konpayi an gen asirans ou vrèman gen yon "machin" ki fonksyone byen, yo mande w refè tès la yon dezyèm fwa.
Nan Faz 2 a, règ yo vin yon ti jan pi fasil. Yo toujou kenbe menm limit pèt yo (pou pwoteje kapital la), men objektif pwofi a desann. An jeneral, yo mande w fè sèlman 5%.
Poukisa? Paske yo pa vle w pran gwo risk ankò. Yo jis vle wè konsistans. Yo vle wè si estrateji w la kapab repete menm bon rezilta a avèk letan.
Faz 3: Machin Nan Sou Wout (Ou "Funded")
Moman ou fin pase de faz sa yo, ou pwouve ou se yon bon operatè. Sistèm konpayi an valyde w. Kounye a, yo ranplase kont vityèl la ak yon kont reyèl (oswa yon kont kote y ap kopye tout sa w fè sou vrè mache a).
Nan etap sa a:
Pa gen objektif pwofi ankò: Ou pa anba presyon pou w fè 8% oswa 5%. Ou ka fè 1% oswa 10% nan mwa a, sa k vini an se li.
Pataj pwofi a kòmanse: Tout pwofi ou fè, konpayi an separe l avè w (souvan 80% pou ou, 20% pou yo).
Ou dwe toujou pwoteje kapital la: Sèl règ ki rete se pa janm touche limit pèt yo (Drawdown nan). Paske se sa k reprezante asirans lavi kont lan.
Sekrè Enjenyè A Pou W Pase
Zanmi m, sistèm sa a fèt pou fè moun ki pa gen disiplin yo pèdi lajan yo peye pou tès la. Se konsa konpayi sa yo fè kòb sou do moun k ap prese yo. Pou w pa tonbe nan pyèj sa a, ou dwe apwoche tès la tankou w ap monte yon biznis solid: ou jere risk la avan ou chache fè gwo benefis. Ou pa miltipliye risk ou pou w fini tès la nan de (2) jou. Ou pran tan w, ou kite lwa pwobabilite a jwe nan avantaj ou
Commentaires
Enregistrer un commentaire